人人講「傷風感冒」，大家又唔識分，所以好多人都會輕視感冒嘅問題。
傷風（Common Cold）可以由好多種病毒引起，比較主要嘅有鼻病毒（Rhinovirus）同埋冠狀病毒（Coronavirus），通常會引致打乞嚏、流鼻水、鼻塞、喉嚨痛等等，病況比較輕微並且集中係鼻同喉嚨等等部份，較少引起發燒。
感冒（Influenza）即係由流感病毒（Influenza Virus）引起，除左會出現傷風徵狀，發燒嘅情況亦會比較嚴重，身體各處亦會出現唔同徵狀，例如肌肉關節痛等等。
由於兩者都係病毒引起，抗生素對佢地一概無效，一般開藥都只會係紓緩不適。對身體健壯嘅黎講，傷風感冒都會係大概一個星期左右自動好返，但係對於兒童、老人家，以及長期病患黎講，就要小心留意感冒嘅徵狀。感冒嚴重起上黎，可以引致支氣管炎、肺炎、自身長期病患嘅惡化，嚴重者甚至可以會導致死亡。
流感病毒有幾種，最常提到嘅分甲型同埋乙型兩種，而病毒表面就有兩款蛋白質，分別叫H（haemagglutinin）同埋N（neuramindase）。呢兩種蛋白質有好多唔同嘅「型號」，於是唔同嘅組合就會出現唔同品種嘅病毒，例如H5N1、H3N2等等。唔同品種嘅病毒對生物有唔同嘅喜好，有D係家禽搵到、有D係豬搵到，平時都只會留係個D生物入面，但係如果出現變種，佢地就有機會傳染埋比人類。
流感病毒好容易變異出新嘅品種，方法有二。
第一種，叫抗原漂移（antigenic drift），即係病毒自身出現微細嘅變異，令到其表面嘅蛋白質出現輕微改變。
第二種，叫抗原轉移（antigenic shift），即係唔同病毒嘅基因係同一個宿主上進行重組，快速出現新嘅品種。例如H2N2同埋H3N8就可以溝出H3N2。
正正由於流感病毒太多種類，變異亦都太快，過去曾經出現多次大爆發，而我地預防嘅方法亦都比較困難。
1968年，香港流感（Hong Kong Flu）H3N2大爆發，引致全球數萬人身亡；1918年，西班牙流感（Spanish Flu）H1N1導致全球五億人染病，死亡人數差不多近億。你仲敢唔敢講「車，感冒啫」。
要預防流感，個人衛生一定要注意，若果係高風險嘅人就更加要盡早求醫。
每年，世界衛生組織都會跟據世界各地所提供嘅數據去預測來年最有機會流行嘅病毒品種，各地藥廠就會就住預測而製造疫苗。預測，即係有機會估錯，而我地亦都只可以相像世衛嘅專家，而且對多幾種病毒有抵抗力又未嘗唔係好事丫。
醫管管：流感指引
http://www21.ha.org.hk/files/PDF/issue%2006_flu.pdf
蘋果日報：每年逾七百人死於流感
http://hk.apple.nextmedia.com/news/art/20150205/19030139
Search